Бројни истражувања покажуваат дека земјите од Адрија регионот сè уште заостануваат зад стандардите на Европската Унија во поглед на застапеноста на жените во управните одбори на компаниите.
Жените сè уште се значително недоволно застапени на извршните позиции во компаниите.
Капитал Daily се заинтересиа како Women on Boards Adria работи на намалување на оваа разлика и каква улога има соработката со корпоративните и институционалните партнери во поттикнување на поинклузивно и родово избалансирано лидерство низ регионот?
Недоволната застапеност на жените во управните одбори во Адрија регионот останува значителен предизвик. Наспроти тоа, неколку земји од Европската Унија постигнаа значителен напредок, главно благодарение на проактивните законски мерки. Земји како Франција и Шпанија воведоа правни цели за зголемување на родовата разновидност во управните одбори, што резултираше со значителни подобрувања.
Women on Boards Adria (WOBA), регионална непрофитна организација посветена на промовирање на родовата еднаквост на одлучувачките позиции, беше основана во 2023 година со цел да ја зголеми родовата разновидност во извршните, и неизвршните органи на управување низ Адриа регионот.
Организацијата соработува со компании, влади и меѓународни институции за да поттикне поголема родова застапеност во управните одбори и извршните позиции на компаниите од јавен интерес.
Неодамна WOBA организираше незаборавна вечер во Скопје и собра бројни партнери, компании, поддржувачи, високи функционери и амбасадори на WOBA. Настанот беше посветен на одбележување на значајниот напредок што Women on Boards Adria го постигна во изминатиот период во промоцијата на лидерството, разновидноста и инклузијата.
Тања Михајловска Димитриевска, е водечката личност на WOBA за Северна Македонија. Таа ги објасни значајните достигнувања на организацијата, особено во Северна Македонија. Потоа следуваше инспиративна дискусија помеѓу Билјана Брајтвајт (Biljana Braithwaite), претседателка на Women on Boards Adria и извршна директорка на Sustineri Partners, консултантска компанија за ESG, и д-р Анино Емува (dr Anino Emuwa), извршна директорка на Avandis Consulting, основачка на глобално признатата мрежа 100 Davos Women, и почитувана членка на Советодавниот одбор на WOBA.
Настанот беше многу повеќе од прослава. Тоа беше сведоштво за моќта на заедницата. За време на приемот, гостите имаа можност да се поврзат со лидери од различни области, да разменат лични приказни и искуства и да ја искористат можноста за поставување на база за започнување на меѓусебна соработка и нови партнерства за иднината.
Ја искористивме оваа можност за да зборуваме повеќе за лидерството, регионалните иницијативи и за тоа што треба да се направи за да се промовира родовата еднаквост и да се зголеми застапеноста на жените на лидерски позиции.
Капитал daily имаше несекојдневна можност одблиску да се запознае со ова друштво дами кои во Скопје ја раскажаа својата мисија, а присутните имаа можност одблиску да се запознаат со темите кои често во суровиот корпоративен свет и се избегнуваат … Се мисли сеуште дека тој свет припаѓа ексклузивно на мажите … Барем овде сеуште така се мисли.
Билјана Брајтвајт
е претседателка на Women on Boards Adria, извршна директорка на Sustineri Partners (консултантска компанија за ESG) и основачка на ESG Adria Summit, регионален бизнис настан.
Истражувањата, како она на McKinsey, покажуваат дека фирмите кои имаат високо ниво на родова разновидност, имаат 25% поголема веројатност да ги надминат своите конкуренти. За да се надминат овие празнини, клучно е да се инвестира во младите таленти. Генерација Z и Милениумците, кои не само што ги обликуваат различните типови на култури на работните места, туку се и иноватори кои ги поттикнуваат одржливите решенија. Иницијативи како Next Gen Adria, која ја лансиравме на ESG Adria Summit и која ги поврзува младите професионалци низ регионот, и Women on Boards Adria (WOBA), која ги подготвува жените со менаџерски вештини, се од клучно значење за обезбедување на сигурност дека регионот ќе има разновидно лидерство што му е неопходно за да напредува.
Капитал: Вие сте искусен лидер длабоко вклучен во промоцијата и имплементацијата на ESG стандардите и најдобрите практики, како и во унапредувањето на агендата за родова еднаквост во Адриа регионот. Што ја поттикнува ESG агендата во Северна Македонија, Западен Балкан и целокупниот Адриа регион кон поодржлива иднина? Колку е важна родовата еднаквост за компаниите од перспектива на ESG?
Брајтвајт: Патот кон постигнување на Целите за одржлив развој на Обединетите нации (UN’s Sustainable Development Goals – SDGs) и Агендата 2030 е навистина комплексен, но тоа е патека која мораме заедно да ја поминеме – и бара целосно ангажирање на приватниот сектор.
Низ различни индустрии, особено оние интегрирани во синџирот на снабдување на ЕУ, компаниите сè повеќе усвојуваат стандарди за животна средина, социјална одговорност и корпоративно управување (ESG). За компаниите во Западен Балкан, вклучувајќи ја и Северна Македонија, оваа транзиција е од суштинско значење. Ова не е само прашање на усогласување со регулативите, тоа е предуслов за останување конкурентен во брзо променливиот пазар.
Усвојувањето на ESG принципите може да отвори можности за зголемена трговија, намалување на невработеноста и поголемо учество во глобалната и европската економија.
Три клучни сили го поттикнуваат овој премин:
Регулаторите, кои воведуваат строги ESG рамки и стандарди;
Инвеститорите, кои ги интегрираат ESG критериумите во своите процеси на донесување одлуки за да го намалат ризикот, и да осигураат долгорочна вредност за компаниите.
Потрошувачите, особено Генерација Z (Gen Z), и Милениумците (Millennials), кои бараат општествено одговорни брендови, и го обликуваат поставувањето на корпоративни приоритети.
Секогаш велиме дека нашиот регион има уникатна позиција да ги претвори овие предизвици во можности. Со својот потенцијал за обновлива енергија, зелени технологии и одржливи иновации, регионот може да предводи во зелената транзиција. Бизнисите кои ги приоретизираат ESG принципите не само што го обезбедуваат своето опстојување, туку и ја зајакнуваат атрактивноста на регионот за инвеститорите кои бараат одржливи можности.
Сепак, оваа трансформација не може да успее без справување со системските нееднаквости, особено родовите дисбаланси.
Оттука, деловниот аргумент за родовата рамноправност е непобитен – компаниите со разновидни лидерски тимови бележат повисока профитабилност, подобро донесување одлуки и подобрена репутација.
Истражувањата, како она на McKinsey, покажуваат дека фирмите кои имаат високо ниво на родова разновидност, имаат 25% поголема веројатност да ги надминат своите конкуренти.
За да се надминат овие празнини, клучно е да се инвестира во младите таленти. Генерација Z и Милениумците, кои не само што ги обликуваат различните типови на култури на работните места, туку се и иноватори кои ги поттикнуваат одржливите решенија.
Иницијативи како Next Gen Adria, која ја лансиравме на ESG Adria Summit и која ги поврзува младите професионалци низ регионот, и Women on Boards Adria (WOBA), која ги подготвува жените со менаџерски вештини, се од клучно значење за обезбедување на сигурност дека регионот ќе има разновидно лидерство што му е неопходно за да напредува.
За Северна Македонија и поширокиот Западен Балкан, ова е пресуден момент. ESG не е само вежба за усогласување со регулативи. Тоа е стратегија за градење отпорност, поттикнување иновации и обезбедување долгорочен економски раст. Заедно, бизнисите, креаторите на политики и заедниците можат да создадат иднина која е праведна, одржлива и просперитетна за сите.
Капитал: Бројни истражувања покажуваат дека земјите од Адрија регионот сè уште заостануваат зад стандардите на Европската Унија во поглед на застапеноста на жените во управните одбори на компаниите. Жените сè уште се значително недоволно застапени на извршните позиции во компаниите. Како Women on Boards Adria работи на намалување на оваа разлика и каква улога има соработката со корпоративните и институционалните партнери во поттикнување на поинклузивно и родово избалансирано лидерство низ регионот?
Брајтвајт: Недоволната застапеност на жените во управните одбори во Адрија регионот останува значителен предизвик. Наспроти тоа, неколку земји од Европската Унија постигнаа значителен напредок, главно благодарение на проактивните законски мерки. Земји како Франција и Шпанија воведоа правни цели за зголемување на родовата разновидност во управните одбори, што резултираше со значителни подобрувања.
Препознавајќи ја ефективноста на ваквите интервенции, Европската Унија ја усвои Директивата за родов баланс во управните одбори. Оваа директива наложува сите земји-членки да ги вградат нејзините одредби во националното законодавство до 28 декември 2024 година.
Според директивата, до 30 јуни 2026 година, компаниите кои котираат на берза треба да се стремат кон најмалку 40% застапеност на помалку застапениот пол меѓу не-извршните директори, или 33% меѓу сите членови на одборите. Нашите соседни земји, Словенија и Хрватска, неодамна го започнаа овој законодавен процес како членки на Европската Унија.
Иницијативата на Европската Унија не е фокусирана само на постигнување родова еднаквост, туку таа исто така ја адресира и деловната придобивка од разновидноста. Зголемувањето на присуството на жени во управните одбори и нивното учество во економското одлучување се очекува да има позитивен ефект врз вработеноста на жените во засегнатите компании и низ целата економија.
Во Women on Boards Adria (WOBA) ја препознаваме клучната улога на законодавното застапување во поттикнувањето промени. Затоа, еден од нашите главни приоритети за 2025 година е да ги поддржиме и да соработуваме со креаторите и носителите на законската регулатива со цел развивање и имплементирање политики кои промовираат родово избалансирано лидерство.
Покрај законодавното застапување, WOBA останува посветена на нашата мисија за промовирање инклузивно одлучување во компаниите, отстранување на бариерите за пристап на жените во управните одбори и забрзување на нивното напредување кон извршни и високи лидерски позиции во Адрија регионот. Преку едукација, обуки и создавање мрежи за талентирани женски лидери, се стремиме да ја подобриме застапеноста и инклузивноста на сите нивоа.
Нашата широка мрежа на корпоративни и институционални партнери, заедно со извонредни лидери кои ја промовираат родовата еднаквост низ регионот, поттикнува значителен напредок кон поинклузивно лидерство. Досега, воспоставивме партнерства со повеќе од 20 организации и ангажиравме над 35 истакнати лидери кои активно ја обликуваат иднината на родовата еднаквост во регионот.
WOBA е доказ за моќта на колективниот напор, а нашата посветеност сè повеќе се забележува во конкретниот напредок што го постигнуваме заедно.
Тања Михајловска Димитриевска
Главен Амбасадор на WOBA за Македонија и Глобален Директор на Внатрешна Ревизија во Инвестициска банка од Обединетото Кралство
Во контекст на Македонија, постојат значајни предизвици:
Присуството на предрасуди, стереотипи и двојни стандарди во општеството и компаниите, каде што лидерските позиции често се поврзуваат со машки особини. Наметливото однесување на жените и мажите во лидерските улоги, различно се перцепира – арогантна жена лидер наспроти маж лидер кој е самоуверен со свој став.
Недостаток на менторски и спонзорски програми, како и недостаток на програми за Board readiness.
Недостаток на застапеност – Жените се недоволно застапени во високи лидерски улоги во различни индустрии, а отсуството на примери и ментори на врвот претставува значајна бариера.
Капитал: Вие веќе 10 години живеете и работите во банкарскиот свет во Лондон. Како глобален лидер, покривајќи повеќе континенти, сте биле дел од надзорни одбори и одбори за ревизија. Вклучени сте во многу иницијативи за женско лидерство во Обединетото Кралство. Какво значење има оваа иницијатива за Македонија?
Михајловска Димитриевска: Работејќи на три континенти во последните 10 години како дел од менаџментот на повеќе глобални банки, можам да кажам дека компаниите направија значителен напредок во родовата еднаквост во органите на управување. Би можела да издвојам три области каде што се постигнати позитивни промени:
Организациски политики: Големи промени во корпоративната култура и вредностите, преку активно говорење на оваа тема од страна на топ менаџментот, без разлика на полот. Ова вклучува градење на политики насочени кон промовирање на родовата еднаквост во процесот на вработување, и промовирање на таленти, како и создавање инклузивни работни средини. Иницијативите како што се флексибилни работни аранжмани и политики за родителско отсуство, играат клучна улога во овој сегмент.
Менторски програми: Постои значителен фокус на програми за менторство и спонзорство, каде што искусни лидери се поврзуваат со потенцијални идни таленти, со цел да им помогнат со насоки и совети, како и креирање на нови можности за поедноставно и побрзо напредување на жените до високи лидерски позиции.
Таргети на ниво на држава: Земјите кои воведоа таргети за родова застапеност постигнаа значителен напредок. Статистиките покажуваат дека во ЕУ, земјите со строги таргети имаат 38% жени на лидерски позиции, додека оние со помеки мерки достигнуваат ниво од 33%.
Во контекст на Македонија, постојат значајни предизвици:
Присуството на предрасуди, стереотипи и двојни стандарди во општеството и компаниите, каде што лидерските позиции често се поврзуваат со машки особини. Наметливото однесување на жените и мажите во лидерските улоги, различно се перцепира – арогантна жена лидер наспроти маж лидер кој е самоуверен со свој став.
Недостаток на менторски и спонзорски програми, како и недостаток на програми за Board readiness.
Недостаток на застапеност – Жените се недоволно застапени во високи лидерски улоги во различни индустрии, а отсуството на примери и ментори на врвот претставува значајна бариера.
Капитал: Колку е важна соработката со компании и различни организации во изградбата на мрежа за лидерство и овозможување на жените да се истакнат во нивните кариери? Какви партнерства сте воспоставиле за WOBA во Северна Македонија и кои активности се планирани?
…. Михајловска Димитриевска: Во целиот Адриа регион, WOBA веќе идентификува голема мрежа на лидери и корпоративни партнери. Исклучително сме горди на нашата активност во Македонија, каде што во изминатата година успеавме да воспоставиме силни партнерства со корпоративни ентитети како ПроКредит Банка, Шпаркасе Банка, НЛБ Банка, Макстил, Тиквеш, ЕОС Матрикс, Халкбанка и Стопанска Банка Скопје, а воедно изградивме и значајна мрежа на индивидуални членови.
Потпишавме меморандуми за воспоставување на институционална соработка со нашите партнери М6 Едукативен Центар, и ГЕА Алијанса за родова еднаквост (GEA), а нашата иницијатива беше препознаена и наиде на поддршка и кај претставниците на видни институции од јавниот живот.
Поддршката од Министерството за енергетика, рударство и минерални суровини, преку министерката Сања Божиновска, која е и Aмбасадор на нашата иницијатива, е од особено значење. Овие партнерства се клучни за реализација на нашата мисија за унапредување на родовата диверзификација и вклученост на жените во корпоративните лидерски позиции во регионот.
Во 2025 година, продолжуваме со обуки и настани, серии на месечни “WOBA разговори“, тркалезни маси за потенцијални промени во законската регулатива и започнуваме со регионална програма за Board Rediness и менторство. WOBA ќе обезбеди истражувања и експертиза кои ќе придонесат за зајакнување на политичката волја и развој на правните рамки за третирање на недоволната застапеност на жените на одлучувачки позиции.
Капитал: Што би добиле економиите во регионот од унапредувањето на родовата еднаквост? Колку е важна Директивата на ЕУ за родов баланс во управните одбори за земјите од Западен Балкан?
Михајловска Димитриевска: Затворањето на прашањето за родовата нееднаквост не само што ја поддржува социјалната правда и рамноправност, туку носи и значителни економски придобивки, вклучувајќи зголемена продуктивност, иновации, конкурентност и проширување на пазарот на потрошувачи.
Податоци од истражувањата на Светска Банка покажуваат дека просечниот бруто домашен производ (БДП) на земјите од Западен Балкан би можел да биде 20% повисок доколку жените учествуваат на пазарот на труд на истото ниво како мажите. Европската Унија предвидува дека до 2050 година, унапредувањето на родовата рамноправност ќе доведе до зголемување на БДП на ЕУ по глава на жител од 6,1% до 9,6%, што претставува зголемување од 1,95 до 3,15 трилиони евра.
Подобрувањето на родовата рамноправност не само што влијае на економскиот раст, туку и родово диверзифицираните тимови во компаниите генерираат подобри резултати во споредба со хомогените тимови. Разновидноста во одборите на директори поттикнува иновации и подобра работнa културa, овозможувајќи подобро разбирање на потребите на потрошувачите.
Директивата на ЕУ за родов баланс во управните одбори, усвоена во 2022 година, има за цел да спроведе транспарентни процедури за вработување во претпријатијата, со цел да се постигне соодветна застапеност на жените во надзорните одбори и на сите менаџерски позиции. Оваа директива служи како инспирација и насока за земјите од Западен Балкан, кои се фокусираат на усогласување со ЕУ директивите на патот кон членство во ЕУ.
Д-р Анино Емува (dr Anino Emuwa)
извршна директорка на Avandis Consulting, основачка на глобално признатата мрежа 100 Davos Women, и застапник за женско лидерство
Јас сум извршен директор на Avandis Consulting, фирма за стратегиско и финансиско советување која работи со претприемачи и деловни лидери, како основач на 100 Women @ Davos, платформа која ги обединува жени лидери кои се фокусирани на правење промени. Мојата кариера ја започнав како корпоративен банкар во Citibank, Нигерија по што дипломирав економија на Лондонската школа за економија. На мојата работна позиција управував со мултимилионски кредитни портфолија за мултинационални компании. Додека работев во корпоративното банкарство, забележав претприемачки празнини на локалните пазари, што ме инспирираше да продолжам со МБА студии на Cranfield School of Management во Велика Британија, каде што се фокусирав на претприемништво. Со текот на годините, живеев и работев во неколку земји низ Европа и Африка. Мојот интерес за решавање на финансиските пречки за помалите бизниси ме доведе до докторски студии по деловна администрација на Nottingham Business School, каде што истражував како да се решат системските бариери за кредитирање и раст на помалите компании. Јас сум страстен поддржувач на жените претприемачи и лидери, и затоа организираме лидерски семинари и деловни настани за вмрежување. Мојата работа денес е фокусирана на лидерство, помагање на бизнисите предводени од жени да напредуваат, поврзување на глобални мрежи и промовирање на вклученост на жените на лидерски позиции.
Капитал: Вие сте основач на 100 Women @ Davos. Кажете ни што претставува таа иницијатива и зошто ја создадовте?
Емува: 100 Women @ Davos е глобална мрежа која ја создадов за да се соочам со еден очигледен проблем што го забележав кога учествував на високо ниво на конференции како што е Давос: недоволната застапеност на жените. Гласовите и перспективите на жените не беа толку видливи како што треба, особено на клучни форуми за донесување одлуки.
Во 2019 година, решив да дејствувам во врска со тоа и ја лансирав 100 Women @ Davos како платформа за засилување на гласовите на жените и создавање на поинклузивни средини и пристап на жените до клучни позиции. Започнавме како мала мрежна група, но побарувачката и интересот брзо ги надминаа нашите очекувања. Нашиот прв настан привлече три пати повеќе учесници од очекуваното, што ја истакна важноста на оваа платформа.
….100 Women @ Davos се развива на многу повисоко ниво од само обичната мрежа. Активно работиме на промовирање на различноста, праведноста и инклузијата, усогласувајќи ги нашите напори со United Nations’ Sustainable Development Goal 5 — особено со Goal 5.5, која има за цел да осигура целосно учество на жените и еднакви можности во лидерството.
Денес, мрежата порасна и брои повеќе од 5.000 членови, со глобална застапеност овозможена преку виртуелни настани, и онлајн платформи. Нашата мисија е да создадеме пристап, да го засилиме влијанието и да осигураме дека жените не само што се наоѓаат во просторијата, туку се наоѓаат и на масата каде што се донесуваат клучните одлуки.
Соработуваме со лидери на највисоките нивоа, работиме на глобални решенија и се залагаме за системски промени. Покрај Давос, присутни сме на Генералното собрание на Обединетите нации, Conference of the Parties дел од UN Climate Change, на главни технолошки и деловни конференции, како и на наши настани во различни градови. Со нашите активности присутни сме на повеќе од три континенти.
Капитал: Зошто е важно вклучувањето на жените во лидерството?
Емува: Вклучувањето на жените во лидерството не е само праведно, тоа е економски и социјален императив. Истражувањата постојано покажуваат дека организациите и економиите подобро функционираат со лидерство што вклучува полова различност. Компаниите со инклузивни лидерски тимови се попродуктивни, посилни и по профитабилни. Кога жените се вклучени во донесувањето одлуки, тие донесуваат различни перспективи, го предизвикуваат групното размислување и инспирираат поинклузивни политики и практики кои му користат на општеството како целина. Дополнително, лидерството на жените има ефект на синџир. Кога жена успева, таа ги поддржува своето семејство, својата заедница и има влијание на идните генерации.
Меѓутоа, инклузијата не се случува автоматски. Таа бара интенција и решителност. Организациите мора да ја третираат родовата различност како стратешки приоритет, да ја поврзат со клучните показатели на успех и да спроведат политики кои ја поддржуваат инклузијата на жените — како еднаква плата, флексибилни работни услови, родителски одмор и решавање на сексуалното вознемирување.
Нам ни се потребни и силни модели на однесување и мрежи за да ја поттикнеме следната генерација на жени лидери. Застапеноста е важна. Кога младите жени ќе видат некој како нив да раководи со бизнис, да води одбор или да зборува на глобален самит, тие се инспирирани да стремат повисоко.
Капитал: Како им помагате на жените да напредуваат?
Емува: Преку мрежите што ги основав, се фокусираме на овозможување на жените да успеат како лидери, претприемачи и двигатели на промени.
Прво, нудиме стратешки советодавни услуги за бизниси водени од жени, помагајќи им да пристапат до финансирање, да ги зајакнат своите менаџерски вештини и да ги зголемат своите операции. Преку семинари за лидерство и настани за извршни директори, создававме можности за жените да се развиваат професионално, да се поврзат со своите колеги и да соработуваат на нови проекти.
Второ, менторството игра клучна улога. Имав среќа да имам ментори во текот на мојата кариера и посветена сум да го пренесам тоа искуство понатаму. Сум менторирала жени преку програми како Cartier Women’s Initiative, Cherie Blair Foundation и како поранешен студент на Nottingham Business School. Лично сум сведок како менторството го значително го забрзува напредокот, гради самодоверба и отвора врати за жените.
Во 100 Women @ Davos, им помагаме на жените да пристапат до глобални мрежи и да добијат видливост на влијателни настани. Поврзувајќи ги жените лидери, поттикнуваме соработки кои ја поттикнуваат бизнис-креативноста и социјалниот импакт. Мрежата исто така се залага за системски промени и политики кои создаваат пофер средина за жените да успеат, така што тие се вклучени на секое ниво на донесување одлуки.
Важно е, преку советување за различност, еднаквост и инклузивност (DEI), да им помагаме на организациите да создадат побогати и инклузивни лидерски тимови како во одборите, така и на сите менаџерски позиции.
Капитал: Се наоѓате на позиции во неколку одбори, а сега и на WOBA. Зошто ова е важно за вас?
Емува: Учеството на одборите ми овозможува да придонесам со својата стручност и увид на стратегиско ниво, помагајќи им на организациите да ги постигнат своите цели, додека истовремено ги поддржувам различноста и инклузијата. Во моментов, сум член на одбори на меѓународни организации, вклучувајќи ја Watch & Jewellery Initiative 2030 и Nottingham Trent University.
Секој од овие одбори ми овозможува да креирам глобална перспектива и да се залагам за проблеми за кои особено сум загрижена – како што се одржливоста, инклузивното лидерство и економскиот развој.
Моето последно назначување во Women on Boards Adria совршено се поклопува со мојата страст за поддршка на жените во лидерство и ми овозможува да го проширам мојот географски досег. Оваа година се приклучив на Советодавниот одбор за да ја поддржам неговата мисија за зголемување на родовата разновидност во извршните, и не-извршните лидерски позиции низ регионот Адрија.
Моите први ангажмани го вклучуваа ESG самитот во мај, настан на WOBA во Црна Гора, настанот за одбележување на успешната годината во Скопје и IFC ESG финансиски настан во Србија, кои беа посетени од лидерите и од значајни организации од регионот.
Беше охрабрувачки да се види растечкиот интерес и посветеност на бизнисите и владите да ги прифатат принципите на ESG и да го унапредат вклучувањето на ниво на донесување одлуки.
Честитки за тимот на WOBA, вклучувајќи го нејзиниот визионерски основач, Билјана Брејтвајт и Тања Михајловска Димитриевска, водечки амбасадор за Северна Македонија. Учеството во одборите ми овозможува и да носам одлуки со кои може да се остварат реални промени.
На пример, посветена сум на тоа да се осигурам дека родовата разновидност не е само извршување на формални обврски, туку стратегиски приоритет. Се залагам за реални политики, мерливи резултати и средини каде што жените можат да успеат. Станува збор и за репрезентација. Жените сѐ уште не се доволно претставени на одборите на глобално ниво и тоа мора да се промени. Преземајќи ги овие улоги, се надевам дека ќе инспирирам други жени да се видат себеси во овие позиции – било како членови на одбори, извршни директори или основачи.
На крајот, работата на одборите беше неверојатно искуство за учење. Работите со брилијантни умови, решаваш сложени предизвици и носиш одлуки кои имаат траен импакт. Тоа е одговорност што ја сфаќам сериозно и возбудена сум што ќе продолжам да придонесувам за организациите кои прават разлика.
Мојот пат е воден од уверување дека лидерството на жените е клучно за економски и социјален напредок. Останувам посветена на создавање можности за жените да водат, успеваат и да остават свој белег во светот. Времето за акција е сега и горда сум што учествувам во градењето на поинклузивна иднина за подобрување на организациите, општеството и нашиот свет.
Преземено од: Kapital.mk